Apo kono eh den?

(eden nak tiru che deal la. Sobolum ekau-ekau sumo nak baco apo yang den tulih ni, ekau warm up lidah ekau supayo sonang nak paham. Den cakap nogori ni, kampung den nun na kek Kolo Pilah. Tak paham, ekau tanyo la sapo-sapo la, pak sedaro ekau ko, acik ekau ko, omak ekau ko. Ni sumo-sumo ni takdo dalam dictionary ni dor. Ekau cari kek wikipedia, google ko, mano ado)


Den tak tahu la. Ni den nak kobar kek ekau-ekau sumo. Ni bukan che-deal yang cakap sekarang ni. Ni adik kombar che-deal yang cakap ni.

Apolah che-deal ni. Nak poi Indon bukan nak ajak den pun. Ni yang buek den maghah ni. Raso-raso eh nak sengkelet yo longan che-deal ni. Lain kali ajak la den skali.

Lopeh tu nak cakap Indon pulak. Nanti den kobar kek omak ekau kang, mahu dio maghah singsing longan dan bertompik kek ekau " Bertuah punyo budak, eden ajar elok-elok bahaso nogori, dio nak cakap Indon pulak". Habis la ekau che deal. Kang torobang pinggan mangkuk belango kek muko ekau.

Laie satu den nak kobar kat ekau ekau sumo. Che deal tu nak poie Indon tu nanti, lombu-lombu, kambing-kambing, kobau-kobau dio sapo yang nak jago? Taik lombu sapo nak buang? Eden maleh nak tolong dor. Tadi den tipon che deal, "jangan jang, jangan jang. Ekau poie Indon tuh nanti, borkonan lak ngan anak daro sano. Mampuh nak poie ngantar ekau nanti".

Kalau ekau poie la che-deal, den tak nak ngantar ekau dor kek Sopang. Eden antar sampai penanggah jo. Ekau naik la prebet sapu sorang-sorang. Laie satu, ekau poie sano tu, jangan gata-gata nak kacau anak daro orang. Kono pelompang Jopon ko nanti.

Apo-apo pun, lain kali, ajak la den skali. Eh, lupo den nak kobarkan. Tok ketuo kampung tanyo, bilo ekau nak mulo motong gotah balik. Ooo..montang-montang gotah hargo dah jatuh, ekau tak mahu poie motong laie. Montang-montang dah jadi jutawan rupiah, lupo ekau kek kampung ekau yo. Nanti den tobang pokok gotah ekau, hampeh pun tak dapek.

Eh, dah melalut lak den. Lupo pulak den, ni ruangan komen ko, ruangan post entri baru? Eden ni main masuk yo. Ekau-ekau sumo jangan kobarkan kek che deal, yang den menyibuk. Kang che deal tu bukan apo, nanti dio bagi lak back hand kek den. Bongkak muko den yang hensem ni.

Maap yo kalau tersinggung kato. Mulut den memang macam ni. bak kato Nabil raja lawak (sedaro den tuh), den pikir lah sendiri.